جناب آقای یونس کریمی لطف فرموده و در برهه های زمانی مختلف اشعار زیبایی از خودشون رو در قسمت نظرات عمومی سایت درج کرده اند .

با توجه به اینکه در قسمت نظرات عمومی ، یادداشتها به مرور زمان پاک شده و از بین می روند ، و لذا برای جلوگیری از این کار تصمیم گرفتم اشعار ایشان را به این قسمت کپی و مرتب کنم . این تنها کاری بود که برای جبران این لطف و محبت ایشان میتوانستم انجام دهم  .

امید که مورد استفاده قرار گیرد

من یونس کریمی 1358 ایلینده خالخالئن فیروزآباد کندینده آنادان اولموشام 3 یاشئندا خالخالا کؤچمک دن سونرا ایبتیدایینی شهید فهمیده ده و راهنمایینی مولوی ده و دبیرستانئ علامه ده اوخویاندان سونرا 77 ایلینده دانشگاه علوم پزشکی تبریزده رادیولوجی لیسانسئنئ آلاندان سونرا دولت کارمندی اولاراق خالخالئمدان و همشهریلریمدن اوزاق آمما اونلارئن عشقیله یاشئیئرام
آز-چوخ لیریک یا عاشقانه(معمولا آیرئلئقلاردان) تورکو شعر یازارام
اوزاقدان هامئزئن گؤزوندن اؤپوره م
اوزون و برکتلی عؤمروز اولسون
خالخالئن قدرین بیلین من هر یئرده چوخ ایفتیخاریله اؤزومو بیر خالخاللئ تانئداراق غورور دویارام

(1)

ارسالی در 12 مهر 91

منی بیگانه سانئردئن،سنین عشقینده یانئردئم
نه یانئردئم!!کول اولوردوم کؤزه ریردیم تالانئردئم


اوره گیم سؤزله دولویدو ایسته ییردیم دئیه م ، امّا
دیلیم آغزئمدا قوروردو اوتانئب دالدالانئردئم


سنی هر لحظه گؤرنده گؤزومون یاشین الیردیم
بیر اوشاق تک کئف ائلیردیم نه دئییردین اینانئردئم


نه قدر نازینی چکدیم نه قدر بوینومو بوکدوم
منه دیوانه دئییردین بونلارئ من نه قانئردئم؟!


سنه ای سئوگیلی جانان!ائله من عاشیقیدیم کی
قاراقوش تک باشئن اوسته دائما هی دولانئردئم


گوندوز اوغروندا یانار کن سارالئردئم بوزارئردئم
گئجه رؤیامه گیرنده دیکسینیردیم اویانئردئم

سورویوردون ، سورونوردوم ، اؤزومو گاه ایتیریردیم
بو قوماردا اودوزوردوم فیکر ائلیردیم قازانئردئم

قاراقوش: پرستو
یونس کریمی

(2)

ارسالی در 15 مهر 91

وصف جمالونده گلیب عالمی حیران ائلرم
بیر کره گؤرمگه سنی جانیمی قوربان ائلرم


باخما بوجور رام اولوب صبر و قرارئن کانئیام
بیر گون اگر اولمایاسان یئر- گؤیو ویران ائلرم


سن کی ووروبسان یارالار قانلئ باخئشلان دیلیمه
من نئجه سن سیز گؤزه لیم!دردیمی درمان ائلرم


سن او طراوتلی باغئن قئرمئزئ خندان گولو سن
من سارئلئقدان اوزومو شرمیله پنهان ائلرم


یونسم عشقه سرورم یار یولوندا پرپرم
پیشمه میش عاشیقلری من عشق یولوندان ائلرم


یونس کریمی

(3)

ارسال : 17 مهر 91

بیرگون یووامئزئ یئخئب گئدرسن
باغرئما بیر قورشون سئخئب گئدرسن
بو شهردن من سیز چئخئب گئدرسن
فیکرون هئپ یانئمدا قالاجاخ آمما

سنی ساخلاماقا گوجوم چاتماسا
بو یورقون گؤزلریم سن سیز یاتماسا
اللرین الیمی هئچده توتماسا
آه – نالام سنی توتاجاق آمما

عشقووون اگر کؤزوده سؤنسه
اوره گون بیر پارچا داشا دا دؤنسه
اؤزگه سی سنین باشئنا دؤنسه
من کیمی سنی سئومه یه جک آمما

قلبیمدن آدئنئ بیر گون سیله جم
بگنمدیگینی بیر گون بیله جم
یئخئلسام دا دوروپ بیر گون گوله جم
مندن سونرا اوزون گولمه یه جک آمما

قورشون :گولوله "گولله هئپ:همیشه

یونس کریمی

(4)

ارسالی در 19 مهر 91

قووزاندئ گؤیلره هارایئم منیم
یئخئلدئ قورولان سارایئم منیم
چاتمادئ او یارا آخ وایئم منیم
آلا گؤز یارئمئ کیملر آپاردئ


بو سسیم سسینه چاتا بیلمه دی
اللریم الینی توتا بیلمه دی
گؤزلریم اونسوز یاتا بیلمه دی
آلا گؤز یارئمئ کیملر آپاردئ

دویونجا بویونو گؤره ممدیم هئچ
یانئندا بو عؤمرو سوره ممدیم هئچ
یولوندا جانئمئ وئره ممدیم هئچ
آلا گؤز یارئمئ کیملر آپاردئ


دویونجا قاداسئن آلا بیلمه دیم
گؤزوندن حسرتی سیله بیلمه دیم
آختاردئم ، یئرینی بیله بیلمه دیم
آلاگؤز یارئمئ کیملر آپاردئ


سیزی آند وئریرم عئشقه - سئوگی یه
آیرئلئق دردیندن اؤلن لیلی یه
سیزی آند وئریرم بو یئره - گؤیه
آلا گؤز یارئمئ کیملر آپاردئ

یونس کریمی

(5)

منسیز غم قوشو قوناجاق باشئنا
طالعینین رنگی قارالاجاقدئر
بوش یئریمه گؤزون ساتاشسا اگر
کؤنلونون باغچاسئ سارالاجاقدئر

تنهالئق سئخئاجاق جانئنئ سنین
دووارلار یویوروب اوستونه گله جک
بوغاجاق قارانلئق گئجه لر سنی
خییالئم شیرین یوخونو بؤله جک

کدرله نه جکسن هر صوبح _هر آخشام
عؤمور بویو اوزون گولمه یه جکدیر
بیرآن سندن اوزاق قالمایان آدام
بیرداها یانئنا گلمه یه جکدیر


یونس کریمی 91/7/24

(6)

ارسال شعر : 7 آبان 1391

آرامئزدا فاصیله لر یئر سالئب
ایکی کؤنول بیربیریندن آیرئلئب
سئوگیمیزین رنگی سولوب سارالئب
گل بارئشاق، بیرده گولک سئوگیلیم!

آرزئلئرام قوجاغئندا اؤلمگی
قویما اؤله ایچیمده کی بو سئوگی
هیجران اودو یاخئبدئ بو اؤره گی
گل بوکمه میش قدّی فلک سئوگیلیم!

داغلار باشئن قارا بولود آلدئ گل!
اوره ک گؤلو نیسگیللرله دولدو گل!
کؤچدو باهار بنؤشه لر سولدو گل!
گل اسمه میش عؤمره کولک سئوگیلیم!

نیسگیل:درد و غم
بنؤشه: بنفشه گولو

یونس کریمی

(7)

ارسال شعر : 9 آبان 1391

الویدا

گئتدیم ای یارئم!نیگارئم! جان و جانان! الویدا
محشره قالسئن حسابئم نا مسلمان ! الویدا

باغلامئشدئق قانیلن پیمان اونوتدون، سن نئدن
بیوفا لئق ائیله دین ؟ بد عهد و پیمان ! الویدا

خون دل سنسیز من ایچدیم تا یئتم بیرگون سنه
یئتمه دیم،یاخدئن منی ای دوشمن جان! الویدا

بسله میشدیم من سنی اشک دل و چشمانیلن
ایندی گز اغیاریلن ای قلبی داشدان ! الویدا

چوخ ستملرائیله دین بیرگون شکایت ائتمه دیم
ای ستمگر!گؤزلریمدن آخدئران قان ! الویدا

گئتدیم آخر من یانئندان باغرئمئ قان ائیله ین!
کؤنلومون شهرین ائدن غارت و ویران الویدا

باغلادئم بارسفر دوشدوم یولا ای بیوفا !
چونکو گؤردوم اولمادئن دردیمه درمان الویدا

یونسم مجنون تک غم مولکونون آواره سی
غم یئمکدن دویمارام دوشمم آیاقدان الویدا

یئتمک:یئتیشمک
یونس کریمی

(8)

ارسال شعر : 13 آبان 1391

سوووشور بو عؤمور سوووشور ایللر
گؤزلریم آرخادان حسرتله باخئر
چئرپئنئر بو اوره ک تیتره ییر اللر
کدرلی گؤزومدن نه یاشلار آخئر!!!

خیالئمئن داغئن دومانلار آلدئ
یاشئل آرزئلارئم سولدو سارالدئ
او گؤزه ل گونلریم هایاندا قالدئ
یادئما دوشدوکجه جانئمئ یاخئر


بورویوب دویقومو زامانئن توزو
یاندئرئب باغرئمئ حسرتین کؤزو
کور اولوب شانسئمئن - بختیمین گؤزو
ایلدئرئم تک غملر کؤکسومه شاخئر

اؤزوم تک آغلایئر الیمده قلم
دردیمی کیمسه یه دئیه بیلمیرم
باغرئمدا قالانئب داغ کیمی بیرغم
اریییر یاغئنئ جانئما یاخئر

یاخماق:یاندئرما ق
گوکسوم:سینه م
دویقو:احساس
کیمسه:هئچ کس
یونس کریمی

(9)

مزارئم اوستونه گلمه

مزاریم اوستونَه گلمَه بیر داها
یانئندا اوُلارکن آز اینجیت می سن؟؟
توُخونما قبریمین داشئنا بِئلُه
باری! قوُی بورادا راحات اویوم من

الیندَه ن اوچان قوش بیر داها دؤنمَه ز
اوُخشویوب سئزلاما ، آغئت سؤیله مَه
آچئلماز اوزونه بو داش قاپئم دای
گؤزونون یاشلارئن بوُشا اَله مَه

قفسدَه ن بیر سارای تیکمیشدین مَنَهَ
کؤنلومون قوشونو سالمئشدئن توُرا
سئخمئشدئن جانئمئ قئزئل قفسدَه
قلبیمین حیسسی نی چکمیشدین دارا

دیری کن قدریمی بیلمَه دین ، ایندی
چئرپئرسان باشئنئ قبیر داشئما ؟ !!!
ابدی یوخویا گِئدَه ن دورانماز
دونیانئن تُورپاغئن تؤکسَن باشئنا¬¬

سارای:کاخ
می:آیا
آغئت: اوخشاما،مرثیه
سئزلاماق : گریه و زاری

اولارکن:اولان زامان یونس کریمی1391/8/17

(10)

ارسال : 21 آبان 1391

بنده بو شعریمی محرم آیئنئن خاطیرینه گؤره اونو اوللده ابا عبدالله الحسینه و ابوالفضل العباسه و سونرا تمام شهدای ایرانا بالاخص خلخالئن عزیز شهیدلرینین روحونه و اونلارئن خانواده سینه هدیه ائله ییره م اولسون کی قبول درگاه حق اولسون

یوللادئم جبهه یه الی خئنالئ
قایئتدئن زامان سئز قانا بویالئ
یارالئ جیسمیندن باشئن آرالئ
یارالئ جانئنا بو جانئم قوربان

قوی اؤپوم قوروموش دوداقلارئندان
قان ایچینده اوزن یاناقلارئندان
چیلیک تک دوغرانان بوداقلارئندان
یارالئ جانئنا بو جانئم قوربان

وطنین داشئنئ کؤکسونه ووردون
یوردونون اوغروندا جانئنئ وئردین
دوشمنین گؤزونه اوخ کیمی گیردین
یارالئ جانئنا بو جانئم قوربان

آنا تک تورپاغئ مقدّس بیلدین
اؤنونده دیز چؤکوب دؤرت قات اییلدین
بؤلونمه سین دئیه ، باغرئنئ بؤلدون
یارالئ جانئنا بو جانئم قوربان

باغلاما گؤزونو دور آیاغا دور!
سارئلئم کسیلمیش بوغازئنا بیر
آچ اللرینی گل! قوجاغئما گیر
یارالئ جانئنا بو جانئم قوربان

یونس کریمی

(11)

ارسال : یکم دی ماه 1391

گئتدی عؤمرومون باهارئ
گوللری حسرت بورودو
سولدو سارالدئ نغمه لر
دیللری حسرت بورودو


گلدی یئتیشدی قئش چاغئ
سؤندو سئوگیمین اوجاغئ
سانکئ شاختا یاخدئ باغئ
چؤللری حسرت بورودو


باغرئم اوسته چؤکدو دومان
اوره ک ائویم اولدو تالان
دوردو آمان سئز بو زامان
ایللری حسرت بورودو


غم یانئمدا کؤلگه لندی
آرزئلارئم کیلکه لندی
ساچلارئما توز الندی
تئللری حسرت بورودو


دؤندو گوندوزوم گئجه یه
یار الویدا دئیه- دئیه
من غم- غصه یئیه- یئیه
ائللری حسرت بورودو


خان چوبان اولدو ساراسئز
هارا گئتسین بو چاراسئز
بوغولدو غیرتلی او قئز
سئللری حسرت بورودو

یاخدئ:یاندئردئ
قایغئ:درد
سانکئ:مثل اینکه

(12)

قانئنان دستاماز آللام دورارام قیبله یه ساری
آچارام اللریمی ،ائیله یه رم گریه و زاری


دییه رم آللاها نیسگیللی اوره کلن،منه بیر باخ!
یاندئم آخر!کوله دؤندوم یئتیش امدادیمه تاری!!


قویمادریا قوشو تک آیرئ قالام من دنیزیمدن
یا وور اؤلدور منی یارب!یا یئتیر تئز او نگاری


نه گلیب دلبریمین باشینه بو گون ، خبریم یوخ
ایستیر امّا بو گؤزوم بیرده گؤره نازلئ او یاری


چئرپئنئر دردلی بو کؤنلوم سینه ده،قانلئ قفسده
اولا آزاد قفسدن، تاپا آرام و قراری


نئیله مک غم یئمه یونس!گئنه ده گؤیده کی خالق
یئتیرر ایسته سه یاری - یئتیرر ایسته سه یاری

نیسگیللی:غملی
دنیز:دریا
یونس کریمی

(13)

وفاسئز

گؤزومون چاغلایان سئلین ، یاغئشئن
باغرئمدا حسرتین قات-قات قئرئشئن
الینین شاختاسئن ، بورانئن، قئشئن
تک جه سن گؤرمه دین آی وفاسئزئم!

آغزئندا قئورئلئب چالان ایلانئ
ایچیمدن قووزانان آهئ-نالانئ
سئوگیمیزین ائوین یئخان طوفانئ
تک جه سن گؤرمه دین آی وفاسئزئم!


یولوندا ان شیرین جانئمدان گئچدیم
قوربانئن اولماغا سینه می آچدئم
دردیمی-غمیمی سو کیمی ایچدیم
تک جه سن گؤرمه دین آی وفاسئزئم!


یولوندا سورونوب یورغونلوغومو
دلی تک عئشقینه وورغونلوغومو
سامان تک سوورولان آرزئ باغئمئ
تک جه سن گؤرمه دین آی وفا سئزئم!


ان شیرین:شیرین ترین
قئورئلماق:بخود پیچیدن چاغلایان:جوشان
یونس کریمی

(14)

دردلی عؤمور گونلریمین
چوخو گئتدی آزئ قالدئ
بو آغاران ساچلارئمئن
اللرینده گؤزو قالدئ


یوخلوغون جانئمئ سئخدئ
هارایئم گؤیلره چئخدئ
حسرتین باغرئمئ یاخدئ
یارام اوسته کؤزو قالدئ


یوللارئندا قالدئ گؤزوم
سون باهارا دؤندو یازئم
دیلدن دوشدو سوسدو سازئم
کیتاب-کیتاب سؤزو قالدئ

عؤمروم - گونوم هدر اولدو
کؤنلومده غم یووا سالدئ
سئوگیمین چیچگی سولدو
باهارا تامارزئ قالدئ

سوسماق:سس سیز، ساکت قالماق سون باهار:پایئز یاخدئ:یاندئردئ
تامارزی:بیر شئیین حسره تینده قالماق
یونس کریمی

( 15 )

ارسال : 18 دی 91

وفاسئزلارا

یارانمئش بیر تک آهویم بیابانلار مکانئمدور
بودونیادان دویان کؤنلوم،عجب خسته بوجانئمدور

نه سندن بیر وفا گؤردوم نه اؤز بختیمنن ای سئوگیل!
گواه لعل گفتارئم ، دئیم ، سوز نهانئمدور

دؤنوب قانه گئدننن سن بو آغلار گؤزلرین یاشی
تحمّل ائیلرم اولسون کی شاید امتحانئمدور

سنیدین تک جه اوممیدیم،مرادیم ای جفا پیشه!
کنون گرداب عشقونده باتان ، بخت جوانئمدور

سنی سئومیشدیم اوّلدن منیم نا مهربان یارئم!
بوکولموش قامتیم،قدّیم او گونلردن نشانئمدور

آلایدون جانیمی جانا! شکایت ائتمزیدیم من
یازام دونیا بویو آزدئ ،گئنه قاصر زبانئمدور

گئدیبسن چوخلو مدّت دیر کناریمدن کمان ابرو!
دئییر یونس سنین سینن گئنه خوش آشیانئمدور

(16)

عؤمرومون بولودسوز- دومانسئز یازئ
قارانلئق گئجه مین پارلاق اولدوزو
آغزئمئن دادئنئن بیر پارچا دوزو
سنیدین-سنیدین گؤزه ل سئوگیلیم!!

آغاران گؤزومون قارا گیله سی
سئودامئن یئخئلماز اومید قالاسئ
کدرلی باغرئمئن هرآن هوسی
سنیدین-سنیدین گؤزه ل سئوگیلیم!!

چنلی یوللارئمئن ائشئغئ - نورو
سئوگی اوجاغئمئن آلووو-قورو
تانرئنئن گؤزونون یاشئندان دورو
سنیدین-سنیدین گؤزه ل سئوگیلیم!!

دونیامئن بزه گی ، باشئمئن تاجئ
چاراسئز دردیمین سون بیرعلاجئ
دویقومون قانادئ ، فیکریمین گوجو
سنیدین-سنیدین گؤزل سئوگیلیم!!

خیلقتین سئویملی گؤیچک ملگی
آرزئلار باغئمئن گولو- چیچگی
بو یوخسول کؤنلومون تک جه ایستگی
سنیدین- سنیدین گؤزه ل سئوگیلیم!!

بولود :بولوت،ابر
چن : مه ، سیس
دویقو : احساس
قاناد : پر
یونس کریمی

(17)

گؤزلریم یا رب! اولوبدور ابر نیسان بو گئجه
الیییر صورتیمه قطرۀ باران بو گئجه

گؤز یاشئم سیله دؤنوبدور آخئرئ هر سویه
سالئرئ سیل سرشکیم قارا طوفان بو گئجه

سانجئلئر قلبیمه غم لشکرینین پیکانئ
بو کدرلی اوره گیمدن آخئدئرئر قان بو گئجه

یوخ کناریمده گؤزه ل سئوگیلیم، او جانانئم
ائیله یه دردیمه چاره ،اولا درمان بو گئجه

سئزلایئر طایر کؤنلوم یوخو آلمئر گؤزونو
چئرپئنئر قانلئ قفسده ائلیر افغان بو گئجه

چکیرم آه دمادم اوره گیمدن ؛ یانئرام
بو قارانلئق گئجه اولموش منه زندان بو گئجه

ظولمت شب آلئب آغوشینه من قاره گونو
سومورور جان دامارئمدان،زلی تک قان بوگئجه

اریدی شمع وجودوم نییه بس صوبح اولمور؟!
هاردا قالمئش او شافاقلئ کوکب دان بو گئجه؟

قورخورام چئخمایا گون،باتمایا آی، ای یونس!
یئتمه دن صوبح وصاله ،وئره سن جان بوگئجه

ابر نیسان : ابر بهاری
کؤنول : اوره ک
کوکب دان:ستاره صبح
سئزلایئر:گریه و زاری
شافاقلئ:آیدئن و روشن
زلی:زالو-سولوک
یئتمه دن : یئتیشمه دن،چاتمادان

یونس کریمی

(18)

دیزلریمده گؤزلرینین یاشئ وار
کاش! بو یاشئ تؤکمه یه یدیم گؤزیننن
اؤزو گئتدی ایزی قالدئ یادیگار
کاش! بو یاشئ تؤکمه یه یدیم گؤزیننن

باغرئ دولو حسره تیمیش بیلمه دیم
بیر یول اونونلا دانئشئب گولمه دیم
گؤزدن آخان یاشلارئنئ سیلمه دیم
کاش! بو یاشئ تؤکمه یه یدیم گؤزیننن

کاش! گیره یدیم من او یارئن قوینونا
قوللارئمئ سارئیا یدئم بوینونا
گلمییه یدیم کور فلکین اوینونا
کاش! بو یاشئ تؤکمه یه یدیم گؤزیننن

گؤرمه دیم هئچ بیر سئوینجی گؤزونده
خان اصلی میش عاشئقلارئن سؤزونده
گونش ایمیش سانکئ یئرین اوزونده
کاش! بو یاشئ تؤکمه یه یدیم گؤزیننن

قالدئ اونون چوخ سؤزلری آغزئندا
بوغدوم اونون آرزئسئنئ یازئندا
ناغئل اولدوم عؤمور بویو سازئندا
کاش! بو یاشئ تؤکمه یه یدیم گؤزیننن

اللریمده بیر قوشودو اوچدو هی!
مارالئ دئ جیرانئ دئ قاچدئ هی!
آرامئزدا آیرئلئغئ سئچدی هی!
کاش! بو یاشئ تؤکمه یه یدیم گؤزیننن


گؤزیننن:ادبی شکلی " گؤزوندن " اولار روان اوخوماقئچئن لهجه فرماسئندا یازدئم
ایز:رد،اثر
خان اصلی : همان اصلی خانم ، کرمین سئوگیلیسی
گونش:گون،خورشید (گونش ایمیش=گونشیمیش:خورشید بود)
سانکئ:مثل اینکه

یونس کریمی

(19)

ساچلارئما دوشن آغلار
باغرئما چکیلن داغلار
دومان باشئن آلان داغلار
سنی خاطئرلادئر منه

گؤزدن آخان شلاله لر
باغرئ کدرلی لاله لر
آرادا کئ فاصیله لر
سنی خاطئرلادئر منه

سون باهاردا کؤچن قوشلار
سئله دؤنن قار - یاغئشلار
قارشئمدا کئ یول - یوخوشلار
سنی خاطئرلادئر منه

خیالئمدا اسن کولک
اوره گیمده سولان دیلک
یازا قوووشمایان چیچک
سنی خاطئرلادئر منه


دوشن : توشن
آغلار: آغ ساچلار(قوجالئق علامتلرینین بیریسی ساچلارئن آغارماسئ دئ)
داغلار: اولی اودونان قویولان بیر دامقا یا مهر ،ایکینجی سی کوه معناسینده
اود: آتش
شلاله : آبشار
سون باهار:پاییز
ایلک باهار : یاز،بهار
قارشئ : مقابل ، روبرو
سولان : پژمرده اولموش
دیلک:آرزئ
یوخوش:سربالایی، اوزو یوخارئ،یوققوش

یونس کریمی

(20)

بولودلاردان ایلهام آلان گؤزلریم!
گؤل تک دولوب هی بوشالان گؤزلریم!
سونوندا تک - تنها قالان گؤزلریم!
سنله نه لر یاشامئشام دونیادا!!!

دنیز- دنیز دالغالانان گؤزلریم!
انتظاردان سؤنوب – یانان گؤزلریم!
هر یالانئ دوز اینانان گؤزلریم!
سنله نه لر یاشامئشام دونیادا!!!

خیالئمئن پنجره سی سن اولدون
اؤره گیمین بیر لال سسی سن اولدون
بو عؤمرومون کور هوسی سن اولدون
سنله نه لر یاشامئشام دونیادا!!!

کؤنول قانئن ایچیب – قوسان سن اولدون
من سوچ سوزو داردان آسان سن اولدون
هم سئوینن هم ده کوسن سن اولدون
سنله نه لر یاشامئشام دونیادا!!!

گاه آغلادئق - گاهدا گولدوک برابر
گاه سئویندیک - گاه اوزولدوک برابر
هارالاردان بورا گلدیک برابر
سنله نه لر یاشامئشام دونیادا!!!

یونس کریمی
بولود: ابر، بولوت
سوچ سوز: بی گناه(سوچ : گناه)
دالغا:موج
کؤنول : اوره ک ، قلب
دنیز: دریا
سونوندا: در نهایت
سؤنمه ک : خاموش اولماق

(21)

دومان داغلارا دوشر کن
خزان باغلارا دوشر کن
اود اوجاقلارا دوشر کن
دوشرم هلبت یادئنا

حسرتیم باغرئن بؤلنده
گؤزلری یاشلا دولاندا
غم گؤلونده بوغولاندا
دوشرم هلبت یادئنا

گئجه، یوخوسوز قالاندا
تنهالئق، جانئن آلاندا
من سیزلیییب ، سئخئلاندا
دوشرم هلبت یادئنا

گؤیده بولود آغلایاندا
اؤلوم گلیب هاخلایاندا
گؤزلریمی باغلایاندا
دوشرم هلبت یادئنا

اوره گی قان اولان زامان
گول یاناغئ سولان زامان
ساچلارئنئ یولان زامان
دوشرم هلبت یادئنا

اود:آتش
هاخلاماق = یئتیشمک
هلبت: البته کی،حتما

یونس کریمی

(22)

سالدئ هیجرون منی مین درده اینان جانانئم!
سانکئ بو دل شَهَرین آلدئ دومان جانانئم!

یاندئ جانیم کوله دؤندی تب عشقونده سنون!
گل کی بو سوز نهان اولدو عیان جانانئم!

سن گئدن گون،بو کؤنول باغینی ماتم بورودو
ووردو طوفان ائله بیل،اولدو خزان جانانئم

سانجئلئر فیکریمه اندیشۀ دیدار رُخون
ائیلیییر قدّیمی خم ،اشکی روان جانانئم!

بایقوش اولموش کؤنولون آه و زارئندان یوخو یوخ
گئجه– گوندوز ایشیدور، آه و فغان، جانانئم!

فرقتوندن اؤلورم ، نار غم ایچره یانئرام
گل قوتار جانیمی بو غمخانادان جانانئم!

سنی آند اولسون او اصلیله – کرم سئوگیسینه
قویما یونس اولا آواره ، آمان! جانانئم!

سانکئ:مثل اینکه
کؤنول:قلب
ایچره:ایچینده