آتیل باتیل چرشنبه ...

بیزیم اولکه ده قدیم دن ایلین آخیر چرشنبه سی میلت ایچینده عزیز دوتولوب اونا بیر خاص مراسیم قائیلیمیش لر کی ایندی ده بو مراسیمین بیر تعدادی ایللر دن سورا ائو لر ده دوتولور ، آما بولارین چوخی  بویوکلرین یادیننان چئخیب و یا اهمیتین ال دن وئریب و اونا خاطیر تزه نسل لر بو مراسیمینن هیچ تانئشلئغ  لاری یوخدی .

تصمیم توتدوخ بو وبسایتئن صفحه سیندن ایستیفاده الییب بو مراسیمی خلاصه شکیلده بیر مرور ائدک ،  بو اومیدینن کی جاوان نسل لر ده آتا بابا لاردان قالان گوزل رسیملری اونوتمیالار و ارزش وئرلر .

سه شنبه گونی :

بو عزیز گون ائوین آناسی اوشاقلارین تزه پالتارلارین گیندیریب ، اولاری مدرسیه یولاسالاردی و ائوین کیشی سی ایشه گدننن سورا ، ائوی سیر سیپیر ائلییب ، قاپ باجاینان دامی سولییئب سیپیرردی .

ائوین کیشی سی ایش دن سورا ائوه گلنده ،چرشنبه شب چره سین آلیب گئتیرردی . چرشنبه شب چره سی عیبارتیدی فندئق ، ایده ، انجیر ، کاسیب نوغولی ،ساری خورما، کیشمیش و ... . خانئملاردا  قورقا قوئوراردیلار . گیردکاننان قورقانی ائشیک دن آلان شب چریه قاتئب مژمه ایه توکردیلر.  یومورتانیدا بویئیب تزئین شکلینده شب چره اوستونه دوزردیلر . بو مژمه یی قرآن،شمع ، آینا ، گوئرتی و سکه ئینن کورسی اوسونه قویولاردی .

اوشاقلار مدرسه دن ئیتیشیب ال آیاغلارین یوئوب ناهاری یئیب یئممیش قاچاردیلا تزه پالتارئنان دامدا اوتوروب گونون باتماغین گودردیلر .

خانواده لر ده رسمیمیش بوگون هئچ امانت هئچ کیمین اوینده قالمیا . بونا خاطیر گون باتمامیشدان قاباغ هر امانت کی ائو ده اولسایدی ییه سینه قیتریلردی.

قئزلار ال لرینه و خانم لار باشلارینا حنا قویوب بئزنردیلر . اوغلانلاردا گئچن گونلردن یئغمئش چئر چئرپینی آپارئب دامدا دئژلیردیلر .

بو گئجه نین شامئنا اریشته پیلو سوزوب با شئنا شش اندازینان قوری بالیغ آسیلاردی. رسمیمیش کی آتا لار و قارداشلار قئز لار و باجی لارین ائوینه گون باتاننان قاباغ شام پایی ، آینا ، گوئرتی ، شمع و چرشنبه لیک گؤندره لر .

گون باتاندا ائوین آغ ساققال آتاسی سی یا آغ بیرچک  آناسی اوشاغلارین الینن یاپیشیب داما آپاراردی . ارسین نن دامین دوره سینه جیزئخ چئکیب دامین دورد گوشه سینه ائوین برکتلرینن دوئی و بوغدا توکوب ، دوعا الیئیب و برکتلی ایل الله دان ایسیردی .

هامی چئرچئرپینین دوره سینده ال اله وئریب یئغئشاردیلار ، اوتی قالییئب ، اوتدان ائو اهالیسینا سلامت چیلیغ ایستیردیلر و اوتدان آتدانماخ مراسیمین باشلاناردی . اوتدان آتیلاندا معمولا بو شعر لر اوخوناردی :

آی اود ، سنون قئرمز لغون منه گلسون  / منیم ساری لیغیم سنه گلسون

قئز لار دیر دی : آتیل باتیل چرشنبه / آینا کیمین بختیم آچیل چرشنبه

اوغلانلار دیردی : الو پیلو چرشنبه / یاغلی پیلو چرشنبه

اوغلانلار هفت ترقه ، بمب و فئشفئشا دا پارتلاداردئلار.

اوتدان آتداناننان سورا گوروشوب و اوپوشردیلر و چون داملار بیر بیرینه یولی واریدی قونشی داملارادا گئدیب چرشنبوز موبارک دیردیلر و هامی با هم شام یئمئغه آشاغی انردی. معمولا سعی اؤلوناردی هر کس اوز ایمکانی قدر جلال لی بیر شام سفراسی دوزه . مثلا سفرا دا تئره قاتئغ یا بورانینان سارئمساغ قاتئغ قویاردئلا .

آمما شامنان سورا .

اوغلان اوشاخلاری شامی یئجه غین قاچئب بیر شال گوتوروب ائو لرین باجاسئننان  و یا قاپی سیننان قورشاق ساللیاردئلار . هر ائو ده گلن قورشاغا یومورتدا ، شب چره ، و چرشنبه لیک باغلاردئلار .

علاوه بو مراسیمه بیر تعداد خانملار نییت ائلییب ائو لره گئدیب ، گیزلین دانئشئلان سوز لره قولاغ آسئب اؤز نیت لرین آلاردیلار . بئله کی خوش کلمه ائشیتمک بونا بنزه ریدی کی آرزئلارئنا یئتیشه جکلر . اونا بینائن ائوین بویوکلری اوشاخلارا تاپشئراردی بو گئجه خوش سؤز لر آغزلارئنا گتیریب دانئشالار ، و معمولا بو شعری تئز تئز اوخیاردئلار :

قئزئل گول ارسین ارسین

قئزیل گولی کیم درسین ؟

هرکس مطلبه گلیب

الله مطلبین وئرسین

چهارشنبه :

صبح یوخودان دوروب صوبحانه نی یین نن سورا هامی با هم ائو دن بیر بولاغا ساری چئخاردیلار  . آنا ائو دن بیرآینا، قیچی و تزه سیپیرگه گؤتورردی . بولاغ باشیندا آخار سودان آتدانئب و الله دان ایستیردیلر ایش لرین بو سو تکین آیدئن و راوا ائلیه . سیپیرگه نی سو دا یویوپ قیچی نن قراخلارئن مرتب الردیلر و بو یاش سیپیرگه نی ائوه گتیریب اونون سویون ائوین دورد گوشه سینه چئرپئب و گئچن ایلین تؤزون سیپیریب آستانادان ائشیگه آتاردئلار .

بوگون اوشاقلار باغدا قالئب یومورتدا توکقوشدورماغ ، فندئق فندئق و چیلینگ آغاج اویونلارینا مشغول اولاردیلار و  بئله خوشلوغلارئنان بایرامین قاباغئنا چئخاردئلار .

اومید بونا دیر کی  بو گؤزل مراسیم لر کی آتا آنا لارئمئزین بیزه یادگاری دیر بئننان آرتئخ ارزش وریله .

چرشنبوز موبارک

تهیه و تنظیم :‌ سعید مدنی ، میلاد شیرعلی پور